Кои се најодалечените градови во Република Македонија

Кои се најодалечените градови
во Република Македонија

Кога станува збор за најодалечени градови во Република Македонија се мисли на градови кои се наоѓаат најблиску до границите на нашите соседи според страните на светот. Па така, во продолжение ќе прочитате кои се тие градови, некои нивни каратеристики и што ги прави интересни истите.

Градот Пехчево се наоѓа во крајниот источен дел на Република Македонија покрај
самата граница со Република Бугарија, во областа Малешевија, и претставува најисточен град во Република Македонија. Се наоѓа на оддалеченост од 10 километри северно од градот Берово и 27 километри јужно од градот Делчево. Сместен е на двата брега на Пехчевска Река, под падините на планината Влаина помеѓу Беровската и Делчевската (Пијанец) Котлина на надморска височина од 1000 метри и претставува втор највисок град во Република Македонија. Според последниот попис од 2021 година во градот Пехчево живеат 2471 жител.

Градот Дебар е сместен во подножјето на планината Дешат во Дебарската Котлина на надморска височина од 625 метри. Се наоѓа на крајниот западен дел од Република Македонија близу до границата со Република Албанија со што претставува најзападниот град во Република Македонија. Во непосредна близина на градот

се наоѓа Дебарското Езеро, познато и како акумулација Шпиље, кое се снабдува со вода од реките Црн Дрим и Радика. Ова езеро наменето е за производство на електрична енергија и наводнување, но во последните години стана актуелно и за спортско-рекреативни и туристички цели. Градот Дебар е познат и по бањите и тоа Бања Бањиште и Бања Косоврасти. Според последниот попис од 2021 година во градот Дебар живеат 11,735 жители.

Градот Крива Паланка е мал и симпатичен град кој се наоѓа во крајните северо-источни делови од Република Македонија и претставува најсеверниот град во нашата држава. Сместен е во котлината Славиште (Кривопалнечка Котлина) помеѓу Осоговските Планини на југ и планините Герман и Билино на север на надморска височина од 645 метри. Распорстранет на двата брега на Крива Река. Крива Паланка е основана во 1633 година, како утврдено место на патот што водел за Бугарија, со цел заштита на преминот во Криворечката Клисура. Во прво време местото имало стратегиска функција и го заштитувал градот од ограбување. Во XVII век, со развојот на рударството во Кратовско паралелно се развивало и во североисточниот регион, носејќи ја железната руда во Крива Паланка која понатаму се доработувала. Поради ова ковачкиот занает бил еден од најбројните во оваа општина во XVII и XVIII век. Денес градот е претпознатлив по еден од најпознатите манастири во Република Македонија, Манастирот Св. Јоаким Осоговски. Се наоѓа во близина на градот Крива Паланка на три километри североисточно од центарот, на падините на Осоговските Планини. Изграден е уште во времето на византискиот император Манојло (1143-1180 г.), а посветен му е на чудотворецот чие име го носи. Според последниот попис од 2021 година во градот Крива Паланка живеат 13,481 жители.

Градот Битола е третиот најголем град во Република Македонија според бројот на жители. Се наоѓа во крајниот југозападен дел на Република Македонија, во подножјето на планината Баба непосредно до грчката граница која е оддалечена 13 км, претставувајќи најјужниот град во Република Македонија. Сместен е во средишниот дел од најголемата котлина во нашата држава, Пелагонија на 615 метри надморска височина. Низ градот тече реката Драгор. Овој град е познат и под името „Град на Конзулите“ бидејќи тука се наоѓале конзуларните претставништва на европските земји во времето на Отоманското Царство. Битола како град е познат и по главното шеталиште Широк сокак, Саат кулата, Музејот на Кемал Ататурк, Јени Џамија итн. Во непосредна близина на градот Битола се наоѓа археолошкото наоѓалиште Хераклеја. Во него се родени доста познати личности кои оставиле голем белег во Македонската историја, културата и спортот како што се: Ѓорѓи Сугарев, Стефан Наумов – Стив, потоа Јонче Христовски, Виолета Томовска, Кире Костов, Горан Стефановски, Каролина Гочева, Игор Дурловски, Ѓорѓи Христов, Димитар Илиевски – Мурато (првиот Македонец кој го искачил највисокиот планински врв во светот Монт Еверест) и многу други. Во Битола се одржуваат и голем број на манифестации и фестивали од кои најпознат е Интернационалниот фестивал на филмската камера „Браќа Манаки“ кој е првиот и најстар филмски фестивал во светот посветен на креативноста на кинематограферите. Првото издание се одржува во 1979 година.

Според последниот попис од 2021 година во градот Битола живеат 71,808 жители.